Arriskuen maparen txostena aurkeztu dugu udaletxean

Soraluze BHIko 3. mailako ikasleek Proiektu Komunitarioak ikasgaian herri mailako pare bat lanketa ari dira burutzen. Horietako bat Begisarerekin osatu dute (ikusmen murriztua dutenen elkartea). Ikusmen murriztua duen jendeak herriko kaleetan dituzten arazoak identifikatzea eta konponbideak proposatzea gaia izan dute abiapuntu. 

Elkarteko hainbat kiderekin egon ostean, Soraluze ikusmen murriztua duten pertsonentzat hobetzeko proiektu bat lantzeko proposatu zieten ikasleei. Kalera irten eta arriskuak non egon daitezkeen aztertu dute. Hobekuntza hauek nahiko sinpleak dira, gehienetan eskailerak nabarmentzea eskatzen da, hau oso lagungarria dela azaldu zutelako.

Lanketa honetan herrian ezaguna den Jose Luis Arizaga, Txipi, eta Pili izan dituzte eta izango dituzte bidelagun. Txipi Begisareko kidea da eta berak oso ondo ezagutzen du herria eta “Arriskuen mapa” osatzeko ezinbestekoa da.

“Arriskuen mapa” Udalarekin eta Begisarerekin elkarlanean osatu nahi da Soraluze inklusiboagoa egiteko abiapuntuak zehazteko, irisgarritasun plana bultzatuz.

Maiatzaren 3an hainbat ikasle eta Txipi bera Udaleko hirigintza teknikariarekin, Lur Etxeberriarekin, batu dira egindako proiektuaren berri emateko.

Osatutako txosten hori lantzen jarraituko dute, oraindik badago eta lana Soraluze herri irisgarriagoa izan dadin, denok eskertuko dugulako, denok egiten eta osatzen baitugu Soraluze.

3. mailako Proiektu Komunitarioak ikasgaiko ikasleak.

Gure ikasleak ABIAN Lanbide Heziketako azokan izan dira.